【告別 DSE 低級錯誤】錯一次就夠！超實用「錯題簿」整理心法，唔再重複失分！
- Econ Excelsior DSE 5**
- 4月17日
- 讀畢需時 4 分鐘
明明上次錯過，點解今次又錯？做錯題目不可怕，可怕的是一錯再錯，浪費寶貴的溫習時間卻沒有進步。想打破這個循環？你需要的不只是埋頭苦幹做更多題目，而是一本「錯題簿」！但錯題簿唔係單純抄低錯題咁簡單，點樣整理先最有效？今日就等我哋同你分享「錯題簿」的正確整理方式，降低一錯再錯的機會！
點解要有「錯題簿」？唔係直接喺份卷度改就得咩？
直接在試卷或練習上改正當然是第一步，但建立一本專屬的「錯題簿」有更深層次的價值：
集中火力，針對弱點： 將所有錯得比較多的題目集合起來，一目了然，方便集中火力針對性地複習和強化。
深入分析，理解盲點： 迫使你唔止係知道答案，更要思考「點解錯？」、「錯喺邊個概念？」，真正理解自己的知識盲點或思維誤區。
避免重複犯錯： 定期翻閱錯題簿，加深記憶，大大減少在考試中重複犯錯的機會。
個人化溫習資源： 呢本係完全為你度身訂造的「精華筆記」，記錄你最需要注意的地方，比任何參考書都更貼合你的需要。
考前高效複習： 臨近考試，與其大海撈針般重溫所有內容，不如重點翻閱錯題簿，提醒自己最容易失分的地方，效率極高。
「錯題簿」點樣整理先最有效？四大步驟：
單純將錯題剪剪貼貼或者抄一次，效果十分有限。一本高效率的錯題簿，應該包含以下關鍵元素：
第一步：篩選題目
唔係所有錯題都要加入： 粗心大意計錯數、睇錯題目抄錯字呢啲「低級錯誤」可以記錄一兩條提醒自己就好，唔需要條條寫入去。
重點收錄：
概念不清的題目： 因為唔理解某個定義、概念、公式而做錯的題目。
典型陷阱題： 容易中伏、考評局鍾意考嘅 tricky 題目。
跨課題綜合題： 需要運用多個知識點但你未能聯繫起來的題目。
反覆錯的題： 做過一次以上仍然做錯的題目。
完全無從入手題： 連題目問咩都唔係好明，需要重點搞清楚的題目。
第二步：完整記錄信息
每條錯題，建議記錄以下信息：
題目來源： 註明係邊一年 Past Paper / Mock Exam / 邊本練習第幾頁第幾題，方便日後查找原題或相關題目。
完整題目： 可以剪貼、影印、截圖或清晰抄寫。
你的錯誤答案： 記錄低你當時嘅諗法同答案，方便同正確答案對比。(呢步好重要！)
正確答案與步驟： 清晰列出標準答案和詳細解題步驟，最好寫埋 Marking Scheme。
【核心！】錯誤分析： 呢個係錯題簿嘅靈魂：
錯在哪裡？ (e.g., 概念理解錯誤？公式用錯？睇漏條件？步驟不完整？推論有錯？)
為什麼會這樣想/做錯？ (e.g., 將 A 概念同 B 概念混淆？忽略咗題目某個關鍵字？計數太急？)
涉及哪些核心概念/知識點？ (標示相關的 Keyword 或 Topic)
【行動！】改正與反思：
正確的思路/方法是什麼？ (用自己理解嘅方式重新拆解一次)
下次遇到同類題目要注意什麼？ (提煉出關鍵的提示或技巧)
可以引伸/相關的知識點？ (例如, A係錯的答案, 咁咩情況A先啱?)
第三步：系統分類整理
按科目： 首先當然係分科目，唔同科用唔同簿。
科目內再分類：
按課題 (By Topic)： 強烈推薦！將同一課題的錯題放在一起，方便比較和歸納該課題的常見錯誤模式。(e.g., Demand supply / ADAS/ GDP / Inflation 等)
形式：
實體簿： 用活頁簿最方便，可以隨時增刪或調整次序。配合顏色標籤 (Color tags) 標示不同課題。
電子化： 用 Notion, Evernote, GoodNotes, OneNote 等 App。優點係方便搜尋、插入圖片/連結，但要小心變成純粹收集題目, 而冇深入思考。
第四步：定期翻閱與重做
錯題簿一定要定期睇返！
即時檢討： 每次操完卷/做完練習，盡快整理錯題。
定期翻閱： 每星期/每兩星期抽固定時間，快速瀏覽錯題簿，加深印象。
主動重做： 隔一段時間 (e.g., 一個月後)，遮住答案和分析，嘗試重新做一次錯題簿上的題目，檢驗自己是否真正掌握。
考前衝刺： 大考前，錯題簿就是你最精華、最高效的温書材料！
整理錯題簿的常見誤區
變成「抄題簿」： 只抄題目答案，冇做錯誤分析同反思，效果大打折扣。
太完美主義： 唔需要用幾種顏色筆畫到成本書咁靚，內容嘅深度先係最重要。
積累太多先整理： 錯題越積越多會好有壓力，變成負擔，最好養成即時整理嘅習慣。
只整理不翻閱： 將錯題簿打入冷宮，等於白費心機。
結論：
整理錯題簿需要時間和心機，但絕對係一項回報率極高嘅投資。佢唔單止幫你認清弱點、避免重蹈覆轍，更重要係培養你「從錯誤中學習」嘅能力同良好嘅溫書習慣。記住，而家錯唔緊要, DSE唔好再錯就ok!
留言