【DSE 防炒車指南】5 招系統性 Check 卷大法！

Econ Excelsior DSE 5**
4月15日
讀畢需時 4 分鐘

明明識做，但就係因為睇錯字、撳錯機、冇寫單位，搞到臨門一腳失分？錯呢啲嘢真係慘過唔識做！「下次小心啲啦！」呢句嘢聽就聽得多，但具體可以點做先？齋靠「提醒」自己係唔夠架！你需要嘅係一套 系統性嘅檢查方法，將 Check 卷變成一個指定動作。今日就教你 5 招 Check 卷大法, 守住啲辛苦搶返嚟嘅分數！

點解「系統性」檢查咁重要？

因為臨場壓力大、時間又趕，淨係靠「我會小心啲」嘅意志力，好容易會走漏眼。有咗一套固定步驟，就好似 Checklist 咁，逐 Part 逐 Part Check，可以大大減低因為慌亂而出錯嘅機會。唔好再信感覺，要信個系統！

K.O. 低級錯誤 5 大系統性檢查法：

方法一：計數機 & 數字覆核

針對問題： 撳錯計數機、抄數字抄錯行/抄錯位、正負號搞錯。
檢查方法：
1. 關鍵數字「再撳一次」： 對於一啲重要步驟嘅計算結果 (尤其係條數好長，或者個答案會影響之後嘅步驟)，唔好信第一下，試下用唔同方法 (e.g., 加括號、分開計) 重新快速撳一次。
2. 答案數字「對返原題」： 將你計到嘅答案數字，拎返去題目度對一對，睇下有冇抄錯題目俾嘅數字？有冇抄錯自己上一步計到嘅數？
3. Check 正負號 & 小數點： 特登望多次個 +/- sign 有冇搞錯，小數點有冇移錯位。

方法二：檢查單位、格式、符號

針對問題： 冇寫/寫錯單位、答題冇跟足指定格式 (e.g., 要求捨入到小數點後兩個位)、圖表 Label 唔齊。
檢查方法：
1. 「單位」地氈式搜索： 拎支筆出嚟，由頭到尾 特登掃一次 所有計到最終答案嘅數字，後面有冇跟啱單位？題目有冇特別要求用咩單位？
2. 「格式」要求確認： 留意題目有冇指定答案格式？(e.g., "nearest dollar", "3 significant figures")
3. 圖表符號檢查 (尤其 Econ/理科)： Econ 圖嘅 Axis Label (P, Q)、曲線 Label (S, D)、均衡點 (E)；理科圖嘅單位、標示等，係咪全部清晰寫齊？

方法三：題目要求再確認

針對問題： 睇錯題目問乜、睇漏關鍵字 (e.g., "not", "except", "only")、冇答晒題目所有要求 (e.g., 叫你解釋再舉例，但淨係解釋咗)。
檢查方法：
1. 拎枝筆「指住」關鍵字讀一次： 尤其是長題目或者有分 part 嘅題目，拎支筆指住題目嘅 Keyword (特別係 Command Words 指令詞 like Explain, Compare, Calculate...) 同限制條件，再望下自己嘅答案，係咪真係回應緊個問題？有冇離題？
2. 檢查 Command Words： 叫你「解釋Explain」你就唔可以淨係「描述 Describe」。確保自己嘅答案符合指令詞嘅要求。
3. 核對分題要求： 如果一條題目有 (a)(i), (a)(ii), (b) 幾部分，confirm每一 part 你都有相應嘅答案，冇睇漏眼。

方法四：分題清單式掃描

針對問題： 成條題答漏咗其中一 part (e.g., 答咗 (a) 冇答 (b))、喺答題簿跳咗題但冇寫清楚題號。
檢查方法：
1. 由頭數一次題號： 揭返去試卷第一頁，由 Question 1 開始，逐題對返你答題簿上面嘅答案。Q1 答咗？Tick。Q2 答咗？Tick... 確保冇成條跳咗。
2. 檢查分題 (a, b, c)： 對於有分 part 嘅題目，望清楚自己係咪 a, b, c (i), (ii) 全部都有對應嘅答案寫低咗。
3. 題號清晰度檢查： 每個答案開頭有冇清晰大大隻字寫啱題號？如果之前有跳題，後來補答，題號有冇寫清楚？

方法五：MC 答案核對大法

針對問題： MC 題填錯格 (諗 A 填 B)、因為中間 Skip 咗一題搞到之後全部答案移咗位。
檢查方法：
1. 間尺輔助對位： 用間尺或者准考證，由上而下逐題對住 MC 紙 (Answer Sheet) 同題目簿 (Question Book)，確保題號同答案選項係 match 嘅。
2. 檢查填漏/重複： 快速掃一次 MC 紙，有冇邊行係完全空白 (可能漏答) 或者填咗多過一個答案？
3. 尾題核對： Check 下你填嘅最後一題題號，係咪同試卷嘅最後一題題號一樣？如果唔同，好可能中間出咗錯。